ரவுடி என்கவுன்டர் வழக்கில் மேலும் 6 போலீஸாருக்கு சிபிசிஐடி சம்மன்!

ரவுடி சங்கர் என்கவுன்டர் வழக்கில் மேலும் 6 போலீஸாருக்கு சிபிசிஐடி சம்மன் அனுப்பியுள்ளது.

கடந்த மாதம் 21 ஆம் தேதி பிரபல ரவுடி சங்கர் சென்னை அயனாவரத்தில் போலீஸாரால் சுட்டு கொல்லப்பட்டார். இந்த வழக்கில் 3 கொலை வழக்கு, 4 கொலை முயற்சி வழக்கு உட்பட 50 வழக்குகளில் தொடர்புடைய ரவுடி சங்கர் என்கவுண்டரில் சுட்டுக் கொல்லப்பட்டார். ரவுடி சங்கர் என்கவுன்டரில் சுட்டுக்கொல்லப்பட்ட வழக்கு சிபிசிஐடிக்கு மாற்றப்பட்டது.

விசாரணையை தொடங்கிய சிபிசிஐடி போலீசார் சம்பவ இடத்துக்கு சென்று வீடியோ எடுத்தனர். பின்னர் ரவுடி சங்கரை என்கவுன்டர் செய்த காவல் ஆய்வாளர் நடராஜன், காவலர் முபாரக், எஸ்ஐ யுவராஜ்,கீழ்ப்பாக்கம் காவல் உதவி ஆணையர் உள்பட 7 பேருக்கு சிபிசிஐடி சம்மன் அனுப்பியது. இதை தொடர்ந்து நேற்று காலை 10 மணிக்கு எழும்பூர் சிபிசிஐடி அலுவலகத்தில் போலீஸார் ஆஜராகி என்கவுன்டர் குறித்து விளக்கமளித்தனர்.

இந்நிலையில் சென்னை அயனாவரம் ரவுடி சங்கர் என்கவுன்டர் வழக்கில் மேலும் 6 பேருக்கு சிபிசிஐடி சம்மன் அனுப்பியுள்ளது. பெண் காவலர் ஜெயந்தி,ஆய்வாளரின் ஓட்டுநர் காமேஷ், சதீஷ், சாட்சி பசுபதி உள்ளிட்ட ஆறு பேருக்கு சம்மன் அனுப்பப் பட்டுள்ளது. 6 பேரும் செப்டம்பர் 10-ஆம் தேதி காலையில் எழும்பூர் சிபிசிஐடி தலைமை அலுவலகத்தில் ஆஜராக உத்தரவிடப்பட்டுள்ளது.