27 நட்சத்திரங்களில் செவ்வாய் பகவானை அதிபதியாக கொண்ட இரண்டாவது நட்சத்திரம் சித்திரை ஆகும்.
சித்திரை நட்சத்திரத்தில் பிறந்தவர்கள் தைரியசாலியாக இருப்பார்கள். தங்கள் பெற்றோர்களிடம் அன்பும் அக்கறையும் அதிகம் வைத்திருப்பார்கள். உதவி கேட்டு வருபவர்களுக்கு தங்களால் முடிந்த உதவியைச் செய்வார்கள். சித்திரை நட்சத்திரக்காரர்களுக்கு கோபம் ஜாஸ்தி. தாங்கள் சொல்வதை மற்றவர்கள் ஏற்றுக் கொண்டே ஆக வேண்டும் என நினைப்பார்கள். எந்த சூழலிலும் தங்கள் கொள்கைகளை விட்டு விலகிச் செல்ல மாட்டார்கள். தங்கள் வாழ்க்கை துணையை மிகவும் நேசிப்பார்கள். எதையும் வெளிப்படையாக பேசுவார்கள்.
எந்த சண்டைக்கும் போகவும் மாட்டார்கள், வந்த சண்டையை விடவும் மாட்டார்கள். தங்கள் குழந்தைகளிடம் அன்பையும், கண்டிப்பையும் சம அளவில் காட்டுவார்கள். சித்திரை நட்சத்திரத்தில் பிறந்தவர்களுக்கு கற்பனைத் திறன் அதிகமாக இருக்கும். சமூகத்தில் உயர்ந்த அந்தஸ்தில் உள்ளவர்கள் மற்றும் ஆட்சிப் பொறுப்பில் இருப்பவர்களிடம் செல்வாக்கு பெற்றிருப்பார்கள். சாதுர்யமாகப் பேசி காரியம் சாதிப்பதில் வல்லவர்கள்.