திருச்சி-கரூர் சாலையில் கனரக வாகன போக்குவரத்தில் மாற்றம் – மாவட்ட ஆட்சித்தலைவர் சு.சிவராசு அறிவிப்பு

திருச்சி : 02.09.20

திருச்சி மாவட்டம், ஒருங்கிணைந்த உள்கட்டமைப்பு மேம்பாட்டுத் திட்டம் 2019-2020-இன் கீழ், நாகப்பட்டினம்-கூடலூர்-மைசூர் சாலைகளை கி.மீ 142/2 153/0 (SHU153) இருவழித் தடத்திலிருந்து மூன்று வழித்தடமாக மேம்படுத்தும் பொருட்டு, அச்சாலைகள் அகலப்படுத்துதல், தடுப்புச்சுவர், பாதுகாப்புச் சுவர், வடிகால் அமைத்தல் போன்ற பணிகள் (திருச்சி குடமுருட்டி பாலம் முதல்

ஜீயபுரம் வரை) நடைபெறுகின்றன. தற்போதைய சூழலில், திருச்சி-கரூர் நெடுஞ்சாலையில் செல்கின்ற கனரக சரக்கு வாகனங்களினால் போக்குவரத்து நெரிசல் ஏற்பட்டு மேற்படி சாலை மேம்பாட்டு பணிகளில் இடையூறு நேரிடுகிறது. மேற்படி பணிகள் தங்கு தடையின்றி நடைபெறவும், போக்குவரத்து நெரிசலை குறைத்திடவும் சிறப்பு சாலை பாதுகாப்புக் குழு கூட்டத்தில் தீர்மானிக்கப்பட்டது.

அதனடிப்படையில், கரூரிலிருந்து திருச்சிராப்பள்ளி நோக்கி வரும் அனைத்து கனரக வாகனங்களும் முசிறி வழியாக நம்பர் 1 டோல்கேட் வரப்பெற வேண்டும். திருச்சிராப்பள்ளியிலிருந்து கரூர் நோக்கி செல்லும் வாகனங்கள் வழக்கமான சாலை மார்க்கத்திலேயே (ஜீயபுரம் வழியாக) செல்ல வேண்டும். இந்நடைமுறை 04-09-2020 தேதி முதல் அமலுக்கு வரப்பெறுகிறது.
மேற்கண்டவாறு மாவட்ட ஆட்சித்தலைவர் சு.சிவராசு விடுத்துள்ள அறிக்கையில் தெரிவித்துள்ளார்.