அடுத்த 36 மணி நேரத்தில் உருவாகிறது புதிய குறைந்த காற்றழுத்த தாழ்வு பகுதி!

கடந்த 21 ஆம் தேதி வங்கக்கடலில் உருவான காற்றழுத்த தாழ்வு பகுதி, தாழ்வு மண்டலமாக உருவாகி, நிவர் புயல் உருவானது. இதனால் தமிழகம் மற்றும் புதுச்சேரியில் கடந்த 2 நாட்களாக கனமழை பெய்து வந்தது. குறிப்பாக கடலூர், விழுப்புரம், புதுச்சேரி உள்ளிட்ட இடங்களில் மரங்கள் மற்றும் மின்கம்பங்கள் சாய்ந்து, மழை நீர் வீடுகளுக்குள் புகுந்து, மின்சாரம் துண்டிக்கப்பட்டிருப்பதால் மக்கள் கடுமையாக பாதிக்கப்பட்டனர். நேற்று முன் தினம் நள்ளிரவு 2 மணிக்கு புதுச்சேரி- மரக்காணம் இடையே நிவர் புயல் கரையைக் கடந்தது.

இந்நிலையில் வங்கக் கடலில் அடுத்த 36 மணி நேரத்தில் புதிய குறைந்த காற்றழுத்த தாழ்வு பகுதி உருவாகும் என இந்திய வானிலை ஆய்வு மையம் தெரிவித்துள்ளது. இது வலுப்பெற்று டிசம்பர் 2 ஆம் தேதி தமிழகம் மற்றும் புதுவை கடற்பகுதிகளை நெருங்கும். இதனால் டிசம்பர் 2 மற்றும் 3 ஆம் தேதிகளில் தமிழகத்தில் ஓரிரு இடங்களில் அதீத கனமழைக்கு வாய்ப்புள்ளது. புதிய காற்றழுத்த தாழ்வு மண்டலம் தமிழக பகுதியை நோக்கி நகரும் என்றும் வானிலை ஆய்வு மையம் எச்சரித்துள்ளது.