அடுத்தடுத்து 3 கடைகளின் பூட்டை உடைத்து பணம் கொள்ளை

சென்னை

மதுரவாயல் பகுதியில் அடுத்தடுத்து 3 கடைகளின் பூட்டை உடைத்து பணம் கொள்ளையடிக்கப்பட்ட சம்பவம் பரபரப்பை ஏற்படுத்தி உள்ளது. சென்னை மதுரவாயல் அருகேயுள்ள எம்எம்டிஏ காலனியில் நேற்று நள்ளிரவு மர்மகும்பல் ஒன்று, அடுத்தடுத்து இருந்த பெட்டிக்கடை, மளிகை மற்றும் பால்கடை என 3 கடைகளின் பூட்டை உடைத்து கொண்டிருந்துள்ளனர். இதனை கண்ட அவ்வழியே சென்ற வாகன ஓட்டிகள், உடனடியாக காவல் கட்டுபாட்டு அறைக்கு தகவல் தெரிவித்தனர்.

இதனையடுத்து சம்பவ இடத்திற்கு மதுரவாயல் போலிசார் விரைந்து சென்ற நிலையில், அதற்குள்ளாக கொள்ளை கும்பல் தப்பி ஓடியது. பின்னர் இதுகுறித்து 3 கடைகளின் உரிமையாளர்களுக்கும் காவல்துறையினர் தகவல் தெரிவித்தனர். அதன்பேரில் கடைகளில் சோதனை செய்தபோது, 3 கடைகளில் இருந்தும் சுமார் 15 ஆயிரம் ரூபாய் பணம் கொள்ளையடிக்கப்பட்டது தெரியவந்தது. கொள்ளை குறித்து வழக்குப்பதிவு செய்த மதுரவாயல் போலீசார், அப்பகுதியில் உள்ள சிசிடிவி கேமரா பதிவுகளை கைப்பற்றி விசாரித்து வருகின்றனர்.