இந்தியாவின் ரூ-பே பண பரிவர்த்தனை நெட்வொர்க்கில் பூட்டான் இணைந்துள்ளது. இந்திய பிரதமர் நரேந்திர மோடியும், பூட்டான் பிரதமரும் இணைந்து, இன்று இரண்டாவது கட்ட சேவைகளை தொடங்கி வைக்கின்றனர்.
கடந்த ஆகஸ்ட் மாதம் பூட்டான் சென்ற பிரதமர் மோடி, இதற்கான ஒப்பந்தம் மேற்கொண்ட நிலையில், தற்போது ரூ-பே நெட்வொர்க் முழுமையாக தொடங்கி வைக்கப்படுகிறது. இதன் மூலம் பூட்டான் வாடிக்கையாளர்கள், இந்திய பண பரிமாற்ற வழியான ரூ-பே நெட்வொர்க்கை முழுமையாக பயன்படுத்த முடியும். காணொலி காட்சி வழியாக இரண்டு நாட்டு பிரதமர்களும் இதை தொடங்கி வைக்கின்றனர். இதுதவிர, இந்தியாவின் இஸ்ரோ ஏவுதளத்திலிருந்து பூட்டான் செயற்கைகோள்களை ஏவுவதற்கான ஒப்பந்தமும் மேற்கொள்ளப்பட்டுள்ளது.
பிஎஸ்என்எல் தொலைத்தொடர்பு சேவைவை பூட்டானுக்கு விரிவுபடுத்தவும் வழிவகை செய்யப்பட்டுள்ளது. அதற்கான செயல்பாடுகளும் இன்று தொடங்கி வைக்கப்படுகின்றன. பிஎஸ்என்எல் நிறுவனம், இந்தியா தவிர வெளிநாடுகளுக்கு அளிக்கும் மூன்றாவது சேவை என்பது குறிப்பிடத்தக்கது. ரூ-பே பண பரிமாற்ற மூலம், பூட்டான் வாடிக்கையாளர்கள் இந்தியாவின் அவர்களின் டெபிட் மற்றும் கிரெடிட் கார்டுகளை பயன்படுத்த முடியும். அதுபோல, பூட்டானிலும் ஏடிஎம் மற்றும் விற்பனையகங்களில் இதன் வழியாக பணம் பரிமாற்றம் மேற்கொள்ள முடியும்.
இந்தியாவும், பூட்டானும் இணைந்து பல முக்கியமான ஒப்பந்தங்களை மேற்கொண்டுள்ளன. கலாச்சார ரீதியாகவும் உறவு கொண்டுள்ள இரண்டு நாடுகளும், தற்போது வர்த்தகரீதியான உறவுகளிலும் ஆழமான உறவை கொண்டுள்ளது என வெளியுறவுத்துறை அமைச்சகம் தெரிவித்துள்ளது.