கிறிஸ்துமஸ் கொண்டாடும், தேவாலயங்களுக்கு செல்லும் இந்துக்களை தாக்குவோம்… பஜ்ரங் தளம் எச்சரிக்கை

அசாமில் கிறிஸ்துமஸ் கொண்டாடும், தேவாலயங்களுக்கு செல்லும் இந்துக்களை தாக்குவோம் என்று பஜ்ரங் தளம் எச்சரிக்கை செய்துள்ளது.

உலகம் முழுவதும் உள்ள கிறிஸ்துவர்க்ள டிசம்பர் 25ம் தேதியன்று கிறிஸ்துமஸ் பண்டிகை கொண்டாட உள்ளனர். கிறிஸ்துவ பண்டிகையாக இருந்தாலும் கிறிஸ்துமஸ் கொண்டாட்டங்களில் மதபாகுபாடு இன்றி பல இந்துக்கள் கலந்து கொள்வது வாடிக்கை. இந்த ஆண்டு அசாமில் உள்ள இந்துக்கள் கிறிஸ்துமஸ் கொண்டாடுவதை தங்களை தாங்களே கட்டுப்படுத்தி கொள்ள வேண்டிய சூழ்நிலை உருவாகியுள்ளது. ஏனென்றால் அசாமில் டிசம்பர் 25ம் தேதியன்று தேவாலயங்களுக்கு செல்லும் இந்துக்களை தாக்குவோம் என்று பஜ்ரங் தளம் எச்சரிக்கை செய்துள்ளது.

பஜ்ரங் தளத்தின் குவஹாத்தி மாவட்ட பொது செயலாளர் மிது நாத் பேசிய வீடியோ ஒன்று இணையத்தில் வைரலாகி உள்ளது. அந்த வீடியோவில் மிது நாத் பேசியிருப்பதாவது: கிறிஸ்துவ ஆதிக்கம் நிறைந்த பிராந்தியமான மேகாலாயாவின் ஷில்லாங்கில் உள்ள விவேகானந்தர் மையம் மூடப்பட்டதால் நான் கோபம் அடைந்தேன்.இதன் விளைவாக, அவர்களின் (கிறிஸ்துவர்கள்) பண்டிகைகளை எந்த இந்துவும் கொண்டாடுவதை நான் விரும்பவில்லை. கிறிஸ்துமஸ் அன்று தேவாலயங்களுக்கு செல்லும் இந்துக்கள் தாக்கப்படுவார்கள்.

ஏனென்றால் எங்கள் வழிபாட்டு தலங்களை அந்த மக்கள் (கிறிஸ்துவர்கள்) மூடிய பிறகு அவர்களின் பண்டிகை நிகழ்வில் சென்று வேடிக்கை பார்க்கும் இந்துக்களை நான் கண்டிக்கிறேன். இந்த ஆண்டு கிறிஸ்துமஸில் எந்த இந்துவும் தேவாலயத்துக்கு செல்லமாட்டார்கள். நாங்கள் அதை உறுதி செய்வோம். நாங்கள் இந்துக்களை தாக்கினால், மறுநாள் செய்தித்தாள்கள் ஓரியண்டல் பள்ளியை அழித்த குண்டா தளம் என்று செய்தி போடுவார்கள் என்று எனக்கு தெரியும். ஆனால் அது எங்கள் முன்னுரிமை அல்ல. அவர்கள் ஷில்லாங்கில் கோயில் வாசல்களை மூடும்போது, கிறிஸ்துமஸின் போது நிகழ்ச்சிகளில் பங்கேற்க இந்துக்களை நாங்கள் அனுமதிக்க மாட்டோம். இவ்வாறு அதில் தெரிவித்துள்ளார்.