கூட்டணி என்பது தோளில் போட்டிருக்கும் துண்டு – பாமக விலகல் குறித்து செல்லூர் ராஜூ கருத்து!!

கூட்டணியில் இருந்து பாமக விலகல் குறித்து அதிமுக எம்.எல்.ஏ. செல்லூர் ராஜூ கருத்து தெரிவித்துள்ளார்.

தமிழ்நாட்டில் உள்ளாட்சித் தேர்தல் அக்டோபர் 6, 9 ஆகிய தேதிகளில் இரு கட்டங்களாக நடைபெறவுள்ள நிலையில் அதிமுக கூட்டணியிலிருந்து பாமக விலகியுள்ளது. கட்சியின் வளர்ச்சி கருதி இந்தத் தேர்தலில் தனித்து போட்டி என்று முடிவெடுக்கப்பட்டுள்ளது என்றும் சட்டமன்றத் தேர்தலில் கூட்டணி தர்மத்தை அதிமுக காப்பாற்றவில்லை; நம்மால் கூட்டணிக் கட்சிகள் பலன் அடைந்தன, அவர்களால் நமக்கு எந்த பலனும் இல்லை.சரியான தலைமை இல்லாததால் அதிமுக தொண்டர்கள் நமக்கு முழு ஒத்துழைப்பு தரவில்லை என்று ராமதாஸ் தெரிவித்துள்ளார்

இந்நிலையில் அதிமுக எம்.எல்.ஏ. செல்லூர் ராஜூ செய்தியாளர்களை சந்தித்த நிலையில், “கூட்டணி என்பது தோளில் போட்டிருக்கும் துண்டு போலதான்; தேவை என்றால் போட்டுக் கொள்வோம் இல்லையெனில் கழற்றி வைத்து விடுவோம். கூட்டணியை நம்பி அதிமுக இல்லை . கூட்டணி என்பது சட்டமன்ற, நாடாளுமன்ற தேர்தல்களில்தான் எடுபடும்; பாமக வெளியேறியதில் வருத்தம் இல்லை” என்று தெரிவித்துள்ளார்.