ஈரோடு: பண்ணை பசுமை நுகர்வோர் கடையில் ரூ.45-க்கு வெங்காயம் விற்பனை

ஈரோடு மாவட்டத்தில் பண்ணை பசுமை நுகர்வோர் கடைகள் மூலம் மானிய விலையில் கிலோ ரூ.45-க்கு விற்பனை செய்யும் திட்டம் இன்று தொடங்கியது. தொடக்க நிகழ்ச்சியில் மாவட்ட ஆட்சியர் கதிரவன், அதிமுக எம்எல்ஏ-க்கள் கே.வி.ராமலிங்கம், தென்னரசு ஆகியோர் கலந்துகொண்டு, பொதுமக்களுக்கு வெங்காயத்தை விநியோகம் செய்தனர்.

முதற்கட்டமாக ஒரு நபருக்கு ஒரு கிலோ வெங்காயம் மட்டும்தான் வழங்கப்பட்டு வருவதாகவும், நாளை முதல் உழவர் சந்தையிலும், பின்னர் படிப்படியாக மாவட்டத்தில் உள்ள அனைத்து ரேஷன் கடைகளிலும் மானிய விலையில் கிலோ ரூ.45-க்கு வெங்காயம் விற்பனை செய்யப்படும் என்று அதிகாரிகள் தெரிவித்தனர். முன்னதாக செய்தியாளர்களிடம் பேசிய ஆட்சியர் கதிரவன், தற்போது மாவட்டத்தில் 5 டன் பெரிய வெங்காயம் வரத்து ஆகியுள்ளதாகவும், முதற்கட்டமாக ஒரு நபருக்கு ஒரு கிலோ வெங்காயம் வழங்கப்படும் என்றும், பின்னர் படிப்படியாக அவை அதிகரிக்கப்படும் என்றும் தெரிவித்தார்.