விபத்தில் பலியான இளைஞர்கள் : தீபாவளிக்கு புத்தாடை எடுக்க சென்றபோது நேர்ந்த சோகம்!

இருசக்கர வாகனம் மீது லாரி மோதிய விபத்தில் வாலிபர்கள் இருவர் பரிதாபமாக உயிரிழந்த சம்பவம் நாகையில் அரங்கேறியுள்ளது.

நாகை மாவட்டம் பனைமேடு கிராமத்தைச் சேர்ந்தவர் பூமிநாதன். இவரது நண்பர் தேமங்கலத்தை சேர்ந்த பபின்ராஜ் . இவர்கள் இருவரும் தீபாவளி பண்டிகை வருவதால் புத்தாடை வாங்க இரு சக்கர வாகனத்தில் நாகையை நோக்கி சென்றுள்ளனர்.

அப்போது சிக்கல் அருகே அவர்கள் சென்று கொண்டிருந்தபோது எதிரே வந்த லாரி ஒன்று பூமிநாதன் – பபின்ராஜ் சென்ற வாகனம் மீது மோதியுள்ளது. இதில் தூக்கிவீசப்பட்ட பூமிநாதன் சம்பவ இடத்திலேயே உயிரிழந்தார்.

இதையடுத்து படுகாயமடைந்த பபின்ராஜை அப்பகுதி மக்கள் மீட்டு சிகிச்சைக்காக நாகை அரசு மருத்துவமனைக்கு அனுப்பி வைத்தனர். ஆனால் அவரும் சிகிச்சை பலனின்றி உயிரிழந்தார்.

இதுகுறித்து வழக்குப்பதிவு செய்த சிக்கல் போலீசார், தப்பியோடிய லாரி ஓட்டுநரை தேடி வருகின்றனர். புத்தாடை எடுக்க சென்ற நண்பர்கள் விபத்தில் பலியான செய்தி குடும்பத்தினர் மத்தியில் பெரும் சோகத்தை ஏற்படுத்தியுள்ளது.