’கரண்ட் பில் இத்தனை லட்சம் ரூபாயா?’ பாடகி ஆஷா போஸ்லே அதிர வைத்து மின்வாரியம்

இரண்டு முறை சிறந்த பாடகிக்கான தேசிய விருதைப் பெற்ற மகத்தான இசைக்கலைஞர் ஆஷா போஸ்லே. அரைநூற்றாண்டும் அதிகமான காலம் சிறப்பான பாடல்களைப் பாடி மக்களை மகிழ்வித்து வருபவர்.

தமிழில் ராமராஜன் நடித்து, இளையராஜா இசையமைத்த ’எங்க ஊர் பாட்டுக்காரன்’ படத்தில் ஆஷா போஸ்லே பாடிய ‘செண்பகமே… செண்பகமே…’ என்ற பாடல் பட்டித்தொட்டி எங்கும் ஒலித்தது. தொடர்ந்து ஹேராம், அலைபாயுதே, இருவர் என குறிப்பிடத்தகுந்தளவில் பாடல்களைப் பாடியுள்ளார்.

தமிழில் குறைவாகப் பாடியிருந்தாலும் இந்தியில் ஏராளமான பாடல்களைப் பாடியுள்ளார். இவர் வாங்காத விருதுகளே இல்லை என்று சொல்லும் அளவுக்கு விருதுகளை வாங்கிக் குவித்திருக்கிறார்.

இப்போதைய செய்தி, இவரின் பாடலைப் பற்றியது அல்ல. இவர் வீட்டுக்கு வந்த மின் கட்டணம் பற்றியது.

மகாராஷ்டிராவில் உள்ள லோனேவாலோவில் வசித்து வருகிறார் ஆஷா போஸ்லே. இவரது ஜீன் மாதக் கட்டணம் 2,08,870 (இரண்டு லட்சத்து எட்டாயிரத்து எண்ணூற்று எழுபது) இதைப் பார்த்தால் யாருக்குத்தான் அதிர்ச்சி வராது.

ஒருவேளை மாதந்தோறும் இப்படி லட்சக்கணக்கில்தான் அவருக்கு மின் கட்டணம் வரும் என நினைப்பவர்களுக்கு ஒரு தகவல். அவர் வீட்டின் ஏப்ரல் மாத மின்கட்டணம் 8,996 ரூபாய்தான்.  மே மாத மின்கட்டணம் 8,855 ரூபாய்தான். இப்போது வந்திருக்கும் கட்டணத்தோடு ஒப்பிட்டால் இரண்டு லட்சம் ரூபாய் அதிகமாக வந்துள்ளது.

அதிகளவில் மின்கட்டண வந்திருப்பதைக் கண்டு அதிர்ச்சி அடைந்த ஆஷா போஸ்லே அப்பகுதி மின்வாரியத்திடம் புகார் அளித்திருக்கிறார். வீட்டுக்கு வந்து ஆய்வு நடத்திய அதிகாரிகள் சரியாகவே கணக்கீடு செய்யப்பட்டுள்ளதாகத் தெரிவித்துள்ளனராம்.

கடந்த சில நாள்களுக்கு முன்புதான் தமிழ்நாட்டில் மின் அளவீட்டில் பெரும் குழப்பம் நடந்ததாகக் கூறப்பட்டது. எதிர்க்கட்சியான திமுக இதற்காக போராட்டமே நடத்தியது. நீதிமன்றத்தில் வழக்கும் நடந்தது.

இப்போது ஆஷா போஸ்லேவுக்கு வந்திருக்கும் மின்கட்டணத் தொகையைப் பார்க்கும்போது இது இந்திய அளவிலான பிரச்னை போல் தெரிகிறது.