“தியேட்டர்களில் 100% ரசிகர்கள் அனுமதியை திரும்ப பெற வாய்ப்பு” : அமைச்சர் விஜயபாஸ்கர்

திரையரங்குகளில் 100% பார்வையாளர்களை அனுமதிக்கும் முடிவு திரும்பப்பெற வாய்ப்பு உள்ளதாக சுகாதாரத் துறை அமைச்சர் விஜயபாஸ்கர் தெரிவித்துள்ளார்.

இந்நிலையில் இன்று சுகாதாரத்துறை அமைச்சர் விஜயபாஸ்கர் புதுக்கோட்டை அரசு மருத்துவக்கல்லூரி மருத்துவமனையில் 3.5 கோடி மதிப்பிலான புதியஇருதய சிறப்பு சிகிச்சை பிரிவு மற்றும் கேத் லேப் சிகிச்சை பிரிவினை துவக்கி வைத்தார். பின்னர் செய்தியாளர்களை சந்தித்த அமைச்சர் விஜயபாஸ்கர், ” மத்திய சுகாதாரத்துறை அமைச்சர் ஹர்ஷ்வர்தன் நாளை தமிழகம் வருகிறார். ஒத்திகை நாளை நடக்கவுள்ள நிலையில் கொரோனா தடுப்பூசி செல்லுவதற்கான பூர்வாங்க பணிகளை ஆய்வு செய்கிறார். திரையரங்குகளில் 100% பார்வையாளர்களை அனுமதிக்கும் முடிவை திரும்பப்பெறுவது தொடர்பாக முதல்வரின் கவனத்திற்கு கொண்டு சென்று நல்ல முடிவு எடுக்கப்படும். பல்வேறு தரப்பிலிருந்து எதிர்ப்பு கிளம்பி உள்ளதால் திரையரங்குகளில் 100% பார்வையாளர்களை அனுமதிக்கும் முடிவு திரும்பப்பெற வாய்ப்பு உள்ளது. மத்திய அரசின் பொதுச்சுகாதார விதிகளில் எந்த சமரசமும் இருக்காது” என்றும் அவர் உறுதியளித்துள்ளார்.

முன்னதாக தமிழகத்தில் கொரோனா பரவல் குறைய தொடங்கியுள்ளதால் தமிழகத்தில் 100% ரசிகர்கள் அனுமதியுடன் தியேட்டர்கள் செயல்பட தமிழக அரசு அரசாணை வெளியிட்டது. இதற்கு பல்வேறு தரப்பினரும் எதிர்ப்பு தெரிவித்து வருகின்றனர். அத்துடன் இந்த அறிவிப்பை திரும்ப பெற வேண்டும் என்று மத்திய உள்துறை தெரிவித்துள்ளது குறிப்பிடத்தக்கது..