ரஜினி -பெரியார் சர்ச்சைக்கு இணையத்தில் ஓய்வு கொடுத்த சூர்யா ரசிகர்கள்!

 இதற்கான அறிவிப்பு வெளியான சில நிமிடங்களில் டிவிட்டரை ஆக்கிரமித்தது #MaaraTheme என்ற ஹேஷ்டாக்.

என்.ஜி.கே, காப்பான் படங்களை தொடர்ந்து இயக்குநர் சுதா கொங்கரா இயக்கத்தில் நடிகர் சூர்யா நடித்துவரும் திரைப்படம் சூரரைப் போற்று. இந்த படத்தில் கதாநாயகியாக அபர்ணா பாலமுரளி நடித்துவருகிறார்.

சூர்யாவின் 2 டி என்டர்டெயின்மென்ட் நிறுவனமும் சிக்யா என்டர்டெயின்மென்ட் நிறுவனமும் இணைந்து தயாரித்துள்ள இப்படத்துக்கு  ஜி.வி.பிரகாஷ் இசையமைக்கிறார். நிக்கேத் பொம்மிரெட்டி ஒளிப்பதிவு செய்கிறார். இந்தியாவில் முதல் பட்ஜெட் விமானப் பயணத்தை உருவாக்கிய ஏர் டெக்கான் உரிமையாளர்  ஜி.ஆர்.கோபிநாத் வாழ்க்கையை மையப்படுத்தி எடுக்கப்பட்டுள்ளது. 

 

இப்படத்தின்  போஸ்டர்கள் மற்றும்  டீசர் சமீபத்தில் வெளியாகி நல்ல வரவேற்பை  பெற்றது. இதையடுத்து இப்படத்தின்  மாறா என்ற தீம் பாடல் இன்று  மாலை 4 மணியளவில் வெளியாகவுள்ளது. இந்த பாடலை சூர்யா பாடியுள்ளார்.  இதற்கான அறிவிப்பு வெளியான சில நிமிடங்களில் டிவிட்டரை ஆக்கிரமித்தது #MaaraTheme என்ற ஹேஷ்டாக்.

சமீபத்தில் துக்ளக் பத்திரிகையின் 50- வது ஆண்டு விழாவில் ரஜினி – பெரியார் குறித்து பேசியது பெரும் சர்ச்சையை ஏற்படுத்தியது. இதற்கு கடுமையான எதிர்ப்பு கிளம்பியது.  தொடர்ந்து அரசியல் கட்சி தலைவர்களின் எதிர்ப்பும், பாஜக ஆதரவாளர்களின் ஆதரவும் ரஜினிக்கு கிடைத்தது. இதனால் இணையத்தில் ரஜினி -பெரியார் விவகாரம் பரபரப்பாக பேசப்பட்டு  வந்தது.இருப்பினும் சூர்யாவின் சூரரைப் போற்று அப்டேட் வந்ததும் ரஜினி -பெரியார் விவகாரம் பின்னுக்கு தள்ளப்பட்டது. இதன் மூலம் சூர்யா ரசிகர்கள் இந்த விவகாரத்திற்கு  சற்று ஓய்வு  கொடுத்துள்ளனர்.