மீண்டும் தமிழில் ரீஎண்ட்ரி கொடுக்கும் நடிகை அமலா: யார் படத்தில் தெரியுமா?

ரஜினியுடன் வேலைக்காரன், மாப்பிளை, கமலுடன் சத்யா என முன்னணி  நடிகர்களுடன் வலம்வந்த அமலா பாலிவுட் படங்கள் வரை நடித்து புகழின் உச்சிக்கு சென்றார்.

நடிகை  அமலா தமிழில் 1986 ஆம் ஆண்டு இயக்குநர் டி.ராஜேந்திரன் இயக்கத்தில் வெளியான மைதிலி என்னை காதலி படம் மூலம் அறிமுகமானார். 

இந்த படம் ரசிகர்கள் மத்தியில் பெரும் வரவேற்பை பெற்றநிலையில், தமிழ் சினிமாவில் முன்னணி நடிகையாக உயர்ந்தார். ரஜினியுடன் வேலைக்காரன், மாப்பிளை, கமலுடன் சத்யா என முன்னணி  நடிகர்களுடன் வலம்வந்த அமலா பாலிவுட் படங்கள் வரை நடித்து புகழின் உச்சிக்கு சென்றார்.

தமிழில் 1991 ஆம் ஆண்டு கடைசியாக கற்பூர முல்லை  படத்தில் நடித்த இவர் நடிகர் நாகர்ஜூனாவை காதலித்து  திருமணம் செய்து கொண்ட  பின்  திரையுலகிலிருந்து விலகினார். தற்போது இவரின் மகன் அகில் தெலுங்கு படங்களில் ஹீரோவாக நடித்து வருகிறார்.  இதனால் கடந்த சில ஆண்டுகளுக்கு முன் தெலுங்கில் ரீ எண்ட்ரி ஆனார். இருப்பினும் இவர் தமிழ் படங்களில் கமிட்டாகவில்லை. 

இந்நிலையில் நடிகை அமலா மீண்டும் 28 ஆண்டுகளுக்குப் பிறகு தமிழில் நடிக்க இருப்பதாக தகவல் கிடைத்துள்ளது. தயாரிப்பாளர் எஸ்.ஆர் பிரபு இப்படத்தை தயாரிக்கவுள்ளாராம். இதுகுறித்து கூறியுள்ள அவர், இயக்குநர்  கார்த்திக் என்னிடம் ஒரு கதை சொன்னார். அதில் ஒரு குறிப்பிட்ட பாத்திரத்திற்கு அமலா நடித்தால் சிறப்பாக இருக்கும் என்றார். இதனால் நாங்கள் அவரை சந்தித்து கதையை சொன்னோம். கதையை கேட்டு உற்சாகமான அவர், கண்டிப்பாக நடிப்பதாக தெரிவித்தார் . இப்படம் நிச்சயம் வெற்றிபெறும் என்று நம்புகிறோம்’ என்றார்.