தீபாவளியன்று எந்த படத்திற்கும் சிறப்புக் காட்சிக்கு அனுமதிக்கவில்லை: அமைச்சர் கடம்பூர் ராஜு..

விஜய் நடிப்பில் பிகில் திரைப்படமும், கார்த்திக் நடிப்பில் கைதி திரைப்படமும் வரும் வெள்ளிக் கிழமை திரையரங்குகளில் வெளியாகவுள்ளன.

விஜய் நடிப்பில் பிகில் திரைப்படமும், கார்த்திக் நடிப்பில் கைதி திரைப்படமும், விஜய் சேதுபதி நடிப்பில் சங்கத்தமிழன் திரைப்படமும் வரும் வெள்ளிக் கிழமை திரையரங்குகளில் வெளியாகவுள்ளன. இந்த திரைப்படங்களின் முதல் காட்சியைக் காண ரசிகர்கள் சிலர் டிக்கெட்டுகளை எப்படியாவது வாங்கி விட வேண்டும் என்று துடித்துக் கொண்டிருக்கின்றனர். தீபாவளிக்கு 2 நாட்கள் முன்னிட்டு இந்த திரைப்படங்கள் வெளியாவதால், அரசு விடுமுறையான தீபாவளியன்று படத்தைப் பார்த்து விடலாம் என்று மற்ற சிலர் எண்ணிக் கொண்டிருந்த நிலையில், அமைச்சர் கடம்பூர் ராஜு தீபாவளிக்குச் சிறப்புக் காட்சிகள் ரத்து எனத் தெரிவித்தார். இந்த செய்தி ரசிகர்களிடையே பெரும் அதிருப்தியை ஏற்படுத்தியது. 

இது குறித்து இன்று எட்டயபுரத்தில் செய்தியாளர்களிடம் பேசிய அமைச்சர் கடம்பூர் ராஜு, பிகில் திரைப்படத்திற்கு மட்டுமல்ல, எந்த திரைப்படத்திற்கும் தீபாவளியன்று சிறப்புக் காட்சிக்கு அனுமதி வழங்கப்படவில்லை என்றும் ஊடகங்கள் பிகில் படத்திற்கு மட்டும் அனுமதி அளிக்காதது போலச் சித்தரிக்கின்றன என்றும் தெரிவித்துள்ளார். 

மேலும், தீபாவளியைப் பயன்படுத்தி திரையரங்கு உரிமையாளர்கள் டிக்கெட்டின் விலையை உயர்த்துவதாக எழுந்த புகாரின் அடிப்படையில் தான் இந்த முடிவு எடுக்கப்பட்டது என்றும் தீபாவளி, பொங்கல் போன்ற பண்டிகைகளை ரசிகர்களும் மக்களும் தனது குடும்பத்துடன் மகிழ்ச்சியாகக் கொண்டாட வேண்டும் என்ற நோக்கிலே இந்த முடிவு செயல்படுத்தப்பட்டது என்றும் அமைச்சர் கடம்பூர் ராஜு தெரிவித்துள்ளார்.