தினகரனுக்காகக் காத்திருக்கும் குக்கர் சின்னம் – இரட்டை இலை யாருக்கு ?

 

தினகரனுக்காகக் காத்திருக்கும் குக்கர் சின்னம் – இரட்டை இலை யாருக்கு ?

இரட்டை இலை சின்னத்தை அதிமுக மற்றும் அமமமுக ஆகிய இரண்டு கட்சிகளும் சொந்தம் கொண்டாடி வருகின்றன.

இரட்டை இலை சின்னத்தை யாருக்கு ஒதுக்குவது என்பது தொடர்பாக அமமுக துணை பொதுச் செயலாளர் டி.டி.வி தினகரன் தொடர்ந்த மேல்முறையீட்டு மனுவை வரும் 15-ஆம் தேதி விசாரணைக்கு எடுத்துக் கொள்வதாக உச்ச நீதிமன்றம் தெரிவித்துள்ளது.

இரட்டை இலை சின்னம் யாருக்கு ?

இரட்டை இலைச் சின்னத்தைத் தங்களுக்கு  ஒதுக்கக் கோரி டெல்லி உயர் நீதிமன்றத்தில், டிடிவி தினகரன் மற்றும் வி.கே.சசிகலா சார்பில் தனித்தனியாக  மனுத் தாக்கல் செய்யப்பட்டது. இம்மனுவை விசாரித்த டெல்லி உயர்நீதிமன்றம் அதைத் தள்ளுபடி செய்ததுடன், இந்த விவகாரத்தில் தலைமைத் தேர்தல் ஆணையம் எடுத்த முடிவு சரியே என்றும் தீர்ப்பு வழங்கியது.

இந்நிலையில், இந்த தீர்ப்பை எதிர்த்து உச்ச நீதிமன்றத்தில் டிடிவி தினகரன் சார்பில் கடந்த 5-ஆம் தேதி மேல்முறையீட்டு மனுத் தாக்கல் செய்யப்பட்டது. அந்த மனுவில், தலைமை தேர்தல் ஆணையம் இரட்டை இலைச் சின்னத்தை ஓ.பி.எஸ் ‌மற்றும் ஈ.பி.எஸ் அணிக்கு வழங்கிய உத்தரவுக்குத் தடை விதிக்க வேண்டும் என்றும், டெல்லி உயர் நீதிமன்றம் வழங்கிய தீர்ப்பை ரத்து செய்ய வேண்டும் என்றும் குறிப்பிடப்பட்டுள்ளது. மேலும், இடைக்காலமா‌க குக்கர் சின்னம் ஒதுக்க வே‌ண்டும் என்றும் தெரிவிக்கப்பட்டிருந்தது.

தினகரனுக்காக காத்திருக்கும் குக்கர் சின்னம் 

இந்நிலையில், இம்மனு மீது வரும் 15-ஆம் தேதி விசாரணை நடைபெறும் என உச்சநீதிமன்றம் அறிவித்துள்ளது. அன்றைய தினமே குக்கர் சின்னத்தை ஒதுக்கக் கோரி தினகரன் தொடர்ந்து வழக்கும் விசாரிக்கப்படும் என உச்ச நீதிமன்றம் தெரிவித்துள்ளது. வரும் 14-ஆம் தேதி வரை குக்கர் சின்னத்தை வேறு யாருக்கும் ஒதுக்கக்கூடாது என தேர்தல் ஆணையத்துக்கு டெல்லி உயர் நீதிமன்றம் தெரிவித்திருந்த நிலையில், இவ்வழக்கு விசாரணைக்கு வருகிறது என்பது குறிப்பிடத்தக்கது.