கொரோனாவுக்கு பாரம்பரிய மருத்துவ சிகிச்சை! எடப்பாடி பழனிசாமிக்கு விஜயகாந்த் கோரிக்கை

கொரோனா நோய் பாதிப்புக்கு சித்தா, ஆயுர்வேதம் உள்ளிட்ட பாரம்பரிய மருத்துவ முறைகளைப் பின்பற்றி சிகிச்சை அளிப்பதில் கவனம் செலுத்த வேண்டும் என்று தேசிய முற்போக்கு திராவிட கழக தலைவர் விஜயகாந்த் வலியுறுத்தியுள்ளார்.

கொரோனா நோய் பாதிப்புக்கு சித்தா, ஆயுர்வேதம் உள்ளிட்ட பாரம்பரிய மருத்துவ முறைகளைப் பின்பற்றி சிகிச்சை அளிப்பதில் கவனம் செலுத்த வேண்டும் என்று தேசிய முற்போக்கு திராவிட கழக தலைவர் விஜயகாந்த் வலியுறுத்தியுள்ளார்.
கொரோனா நோயாளிகள் மற்றும் அவர்களுக்கு சிகிச்சை அளிப்பவர்களுக்கு நிலவேம்பு குடிநீர், கபசுர குடிநீர் உள்ளிட்டவை அளிக்கப்படுகிறது. இதற்கான உத்தரவை தமிழக அரசு சில தினங்களுக்கு முன்பு வெளியிட்டது. இந்த நிலையில் சித்தா உள்ளிட்ட பாரம்பரிய மருத்துவ முறையின் அவசியத்தை வலியுறுத்தி விஜயகாந்த் அறிக்கை வெளியிட்டுள்ளார்.

அதில், “சீனாவில் தொடங்கிய கொரோனா வைரஸ் உலக நாடுகளை அச்சுறுத்தி வருகிறது. பல உயிர்களை பலி வாங்கியுள்ள இந்த தொற்றுக்கு, இதுவரை மருந்து கண்டுபிடிக்கப்படவில்லை. மேலும், தமிழகம் முழுவதும், 2 ஆயிரத்திற்கும் மேற்பட்டோருக்கு கொரோனா தொற்று உறுதி செய்யப்பட்டுள்ள நிலையில், நாளுக்கு நாள் நோய் பாதிப்பு அதிகரித்துக்கொண்டே வருகிறது.
எனவே, கொரோனா வைரஸ் மேலும் பரவாமல் தடுக்க பாரம்பரிய மருத்துவமான ஹோமியோபதி, சித்தா, ஆயுர்வேதம், யுனானி போன்றவற்றை நாம் நிச்சயமாக கவனத்தில் கொள்ள வேண்டும்.

மருத்துவர் தணிகாச்சலம் போன்றவர்கள் தொடர்ந்து இதை வலியுறுத்தி வரும் வேளையில், ‘சிறு துரும்பும் பல் குத்த உதவும்’ என்ற பழமொழிக்கேற்ப, இந்த காலகட்டத்தில் எதையும் அலட்சியமாகக் கருதாமல், ஹோமியோபதி, சித்தா, ஆயுர்வேதம், யுனானி மருத்துவர்களை அழைத்துக் கலந்தாலோசனை செய்து அவர்கள் கூறும் சிகிச்சை முறைகளைக் கேட்டறிந்து கொரோனா வைரஸால் பாதிக்கப்பட்டு தனிமைப்படுத்தப்பட்டுள்ளவர்களுக்கு 15 நாட்களுக்கு சிகிச்சை அளித்து, பரிசோதிக்கலாம்.
அவ்வாறு செய்யும்போது, அதில் பலன் இருந்தால் அந்த சிகிச்சை முறையை தொடரலாம்.

கொரோனா வைரஸ் மேலும் பரவாமல் தடுக்க நமது பாரம்பரிய மருத்துவமான சித்தா, ஆயுர்வேதம், யுனானி போன்றவற்றை நாம் நிச்சயமாக கவனத்தில் கொள்ளவேண்டும்.
தமிழர்களின் பாரம்பரிய சிகிச்சை முறையை உலகிற்கும் நாம் கொண்டு செல்ல முடியும்.#COVID19 | @CMOTamilNadu pic.twitter.com/F1SAjxawPD

— Vijayakant (@iVijayakant) April 30, 2020

மேலும், இதன் மூலம், தமிழர்களின் பாரம்பரியமான சிகிச்சை முறையை உலகுக்கும் நாம் கொண்டு செல்ல முடியும். ஏனெனில், கபசுரக்குடிநீர், நிலவேம்பு கசாயம் வேப்பிலை, மஞ்சள் சுடுதண்ணீர், உப்பு, இவையனைத்தும் தொற்றிலிருந்து காப்பாற்றும் என்பது நம்பிக்கை.
அதுபோல், கொரோனாவும், ஒரு வைரஸ் தொற்றுதான். எனவே, இதற்கு நிச்சயம் பாரம்பரிய சிகிச்சைகள் பலன் அளிக்கும் என நம்பிக்கை இருக்கிறது. குஜராத் மாநிலத்தில் பாரம்பரிய மருத்துவ சிகிச்சை மூலம் நல்ல பலன் கிடைத்துள்ளது என்று அறிய வந்துள்ளோம். எனவே, பாரம்பரிய மருத்துவர்களை கலந்து ஆலோசித்து, அந்த மருத்துவ சிகிச்சையை, தமிழகத்தில் தனிமைப்படுத்தப்பட்டு உள்ளவர்களுக்கு அளிக்க வேண்டும்” என்று கூறியுள்ளார்.